Быйыл төрөөбүт тыл, сурук-бичик бэлиэ күн чэрчитинэн Дьокуускай куорат иҺигэр ыытыллыбыт араас тэрээҺиннэргэ сырыттыбыт.
Олунньу 15 күнүгэр “Арчы” дьиэтигэр 8 “Е” кылаас үөрэнээччилэрэ – Алексеева Айталина, Афанасьева Эдуарда, Гаврильева Юлия, Иванов Никита, Макаров Денис, Николаева Саина “Два языка – два родника” диэн ааттаах сыл аайы ыытыллар улахан тэрээҺиҥҥэ ситиҺиилээхтик кытыннылар. 9 араас оскуола оҕолоро быйылгы үбүлүөйдээх саха поэтессата Наталья Михалева-Сайа уонна актер, режиссер, сценарист Андрей Хорошев-Андрей И аналлаах күрэххэ кытыннылар. Билиини тургутар түҺүмэхтэри аастылар, сорудахтарга хоруйдаатылар. Бэйэни билиҺиннэриигэ сахалыы-нууччалыы саҥаран, хоҺоон ааҕан холоннулар. Денис Макаров “Два языка, как два крыла” диэн Алексей Михайлов хоҺоонун иҺирэхтик ааҕан, хомус тардан мустубут оҕолор, дьүүллүүр сүбэ биҺирэбиллэрин ылла.
Маннык таҺымнаах курэх оҕону патриотическай тыыҥҥа иитии, норуотун тылын-өҺүн, култууратын, үтүө үгэстэрин, олоҕун-дьаҺаҕын, сиэрин-туомун билэригэр төҺүү күүс буолар. Үөрэнээччилэр Дьокуускай куорат үөрэҕин управлениетын салайааччыта А.К.Семенов бэлэҕин уонна Андрей Хорошев-Андрей И анал бирииҺин ылан, үөрүүлэрэ муҥура суох.
Васильева Аида Николаевна –
саха тылын уонна литэрэтиирэтин учуутала
